MFAHAMU GOLI KIPA RENE HIGUITA MZEE WA SCORPION KICK

Na Mwandishi wetu.

Jina lake kamili ni Jose Rene Higuita Zapata (58) mzaliwa wa Medellin, Antioquia nchini Colombia miaka ya 1966, nyota huyo alikataa kutumia jina alilopewa na baba yake mzazi la Jose Zapata na kuamua kutumia jina la mama yake Rene Higuita baada ya baba yake kuwatelekeza yeye na mama yake akiwa mchanga.

Lakini pia mambo yalikuwa magumu kwa Rene Higuita baada ya mama yake kufariki wakati nyota huyo akiwa bado mdogo na kupelekea kulelewa na Bibi yake.

Nyota huyo alianza kucheza soka kwenye klabu ya Millonaros mwaka 1985 na Baadae nyota huyo alijiunga na Atletico Nacional, Real Valladolid, Veracruz, Independiente Madellin, Real Cartagena, Aucas, Deportive Pereira, Guaros Atletico Junior na klabu yake ya mwisho ni Deportive Pereira.

Higuita si jina geni kwa wafuatiliaji na wapenzi wa mchezo wa soka, ni kioo kwa makipa wengi Duniani ambao wanaitwa makipa wa kisasa wenye uwezo wa kuchezea mpira kwa miguu, kupiga pasi sahihi, chenga, kupiga Free kick, umahiri wa kufunga magoli na kudaka penati kwenye milingoti mitatu, na mfano mzuri wa makipa hao ni Andre Onana, Manuel Neuer, Aderson, Djigui Diarra na Ronwen Williams ambao wanamatumizi sahihi ya miguu yao.

Higuita ndiye chanzo cha shirikisho la soka Duniani (FIFA) kuweka kanuni ya kuzuia makipa kudaka au kushika kwa mkono pasi au mpira utakaopigwa na mchezaji mwenzake wa timu mmoja kwa mguu isipokuwa mpira wa kichwa ndio anaruhusiwa kushika kwa mkono ilifahamika kama “Higuita Rule”, iliyoanzishwa mwaka 1990 na kuanza kutekelezwa 1992 ili kuzuia upotevu wa muda na kufanya mchezo uwe na kasi zaidi.

Kanuni ya “Higuita Rule” iliwekwa baada ya matukio ya kombe la Dunia mwaka 1990 ambapo makipa kama Sergio Goycochea wa Argentina, Luis Gabelo Cacejo wa Costa Rica na Walter Zenga wa Italia walipoteza muda mwingi kuchezea mpira kwa mikono.

Higuita anashika nafasi ya 5 Duniani kwenye orodha ya magoli kipa waliofunga magoli mengi akifunga magoli 43 nyuma ya Jonny Vegas Fernandez mwenye magoli 45, Jorge Campos magoli 46, Jose Chavalert magoli 67 na kinara akiwa Rogerio Ceni akifunga magoli 131.

Pia Higuita anakumbukwa zaidi mwaka 1995 kwenye dimba la Wembley, Uingereza kwenye mchezo wa kirafiki kati ya Uingereza dhidi ya Colombia ambapo Higuita alipiga Scopion Kick mpira uliokuwa ukienda nyavuni na kufanya kuwa miongoni mwa matukio maarufu kwa goli kipa huyo na akitajwa kuwa mchezaji wa kwanza kupiga mpira kwa pigo la Ng’e aliyenyanyua mkia wake.

Higuita alistaafu soka rasmi mwaka 2010 ambapo aliweka wazi kuwa anafuraha na anajivunia kuweka historia kwenye soka kama nyota maarufu Duniani kiwatolea mfano Pelle pamoja na Maradona.

Nje ya soka nyota huyo aliwahi kufungwa gerezani mwaka 1993 kwa kuhusishwa na utekaji nyara na biashara ya dawa za kulevya baada ya kuwa na ukaribu na muuza madawa ya kulevya maarufu Duniani Pablo Escobar, pia 2004 alipimwa na kukutwa na madawa ya kulevya aina ya Cocaine kwenye mwili wake wakati anaitumikia klabu ya Aucas ingawa amekuwa akikana tuhuma hizo alipokuwa akifanya mahojiano mara kadhaa na kwenye vyombo vya habari.

#NTTupdates