SERIKALI YATOA MAGARI YA AFYA MKOA WA ARUSHA.

Na Mwandishi wetu

SERIKALI ya awamu ya sita kupitia Ofis ya Rais TAMISEMI, imetoa magari manne ya kubeba wagonjwa na kutoa huduma za afya katika Halmashauri za wilaya ya Longido, Ngorongoro, Hospitali ya Rufaa ya Mount Meru pamoja na lori moja kwaajili ya Kliniki tembezi yenye thamani ya sh. milioni 646.360 kwa mkoa wa Arusha.

Akikabidhi magari hayo kwa viongozi wa taasisi hizo, Mkuu wa Mkoa wa Arusha, John Mongella, amesisitiza kliniki hiyo tembezi ianzie wilayani Ngororongoro ili wananchi wapate huduma za afya katika maeneo yao kwa kadri ratiba itakavyopangwa.

Mongella amesema, Rais Dkt. Samia Suluhu Hassan, anafanya jitihada kubwa kuboresha sekta ya afya na ndio maana ametoa magari hayo, kwaajili ya kusaidia wananchi kupata huduma za afya karibu na maeneo yao na kuongeza kuwa magari hayo yaliyotolewa yanapaswa kutoa huduma za afya kwa wananchi na si vinginevyo.

Naye Mganga Mkuu wa Mkoa wa Arusha, Dkt. Mkombachepa ameishukuru Serikali kwa kuboresha huduma za afya, ikiwemo utoaji wa magari hayo manne, ambayo yataenda kuokoa maisha ya wananchi ikiwemo wagonjwa wa dharura, wajawazito wanaojifungua na watoto wachanga wenye changamoto za kiafya.

#NttUpdates